Доделување награди од
Конкурсот за најдобар фил(м)ософски есеј, СВЛ и натпревари

Доделувањето на наградените ученици од Конкурсот за најдобар фил(м)ософски есеј како дел од Средношколската видео лектира, сегмент од Едукативната програма на 13. Филозофскиот филмски фестивал (13. ФФФ) ќе се одржи на 31 мај 2023 во Кинотека. Годинава околу 500 ученици од 13 училишта (11 градови) имаа можност да го погледнат шпанскиот класик „Духот на улиштето“ од Виктор Ерисе (1973), а потоа пишуваа есеј на тема: „Детската игра, фантазијата и соочувањето со конечноста на животот“. Пристигните есеи ги оцени Стручна комисија во состав: проф. д-р Марија Тодороска, проф. д-р Вангел Ноневски и проф. д-р Владимир Мартиновски, и го определи следниот пласман на наградените:

3️⃣ТРЕТО МЕСТО – БЛАГОЈ ПАНОВ (ментор: Снежана Арџанлиева Танева), (СОУ „Јосиф Јосифовски“ – Гевгелија);
2️⃣ВТОРО МЕСТО – ЈОВАНА МЕЧЕВА (ментор: Даниела Гражданлиева), СОУ „Св.Кирил и Методиј“ – Неготино;
1️⃣ПРВО МЕСТО – ТЕОДОРА ЛАЗЕСКА (ментор: Јане Богоески), ОСУ „Св. Климент Охридски“ – Охрид.

Тројцата наградени ученици ќе добијат: соодветни сертификати, паричен хонорар и книги, списанија и зборници од Филозофското друштво на Македонија (ФДМ) и ФФФ, годишни стипендии од Универзитетот Еуропа Прима, книги и курсеви по шпански јазик од Амбасадата на Шпанија во Скопје, книги од издавачката куќа „Аз-Буки“, филмови од Кинотеката на С. Македонија.
Свечениот настан за доделување на наградите ќе се одржи на 31 мај (среда, 13ч.) во Кинотеката на С. Македонија. На настанот ќе се доделат и наградите од натпреварот по Филозофија и македонскиот натпревар за Меѓународната филозофска олимпијада.

Во однос на натпреварот по Филозофија, сертификати за учество ќе добијат сите ученици (и нивните наставници ментори) што учествуваа на Државниот натпревар (11 март, Филозофски факултет – Скопје, ФзФ), второ и трето пласираните ученици соодветни сертификати, додека 4-те првопласирани ученици и награди во форма на книги/списанија/зборници од ФДМ и ФзФ. Двата првопласирани ученика од натпреварот за македонската филозофска олимпијада коишто учествуваа на XXXI Меѓународна филозофска олимпијада (11-14 мај, Олимпија, Грција) ќе добијат сертификати и книги/списанија/зборници од ФДМ.
На настанот се добродојдени сите ученици што учествуваа на некој од споменатите натпревари, како и нивните соученици, наставници, пријатели, родители и други блиски.
Им честитаме на сите наградени, како и на сите учесници на натпреварите и на конкурсот и им посакуваме плодна работа и успеси во иднина!