СВЕТСКИ ДЕН НА ЛОГИКАТА 2026

Институтот за филозофија при Филозофскиот факултет во Скопје и Филозофското друштво на Македонија по петти пат ќе го одбележат Светскиот ден на логиката. По тој повод, ќе се одржи онлајн предавање на тема: „ВТЕМЕЛУВАЊЕТО И НЕГОВАТА ЕПИСТЕМОЛОГИЈА“ (Grounding and its Epistemology), со д-р Дамјан Алексиев.

Дамјан Алексиев е постдокторски истражувач при Виенскиот Универзитет (Universität Wien), оддел филозофија, каде што првенствено работи на проект чија тема е природата на метафизичкото објаснување, финансиран од Австрискиот научен фонд (FWF). Освен на тековниот проект, работел и како предавач при Виенскиот Универзитет. Докторските и магистерските студии ги има завршено на Централниот Европски Универзитет (Central European University), а дипломирал на Универзитетот „Св. Кирил и Методиј“ во Скопје. Има објавувано трудови на тема метафизика на свеста и метафизичкото објаснување во Journal of Consciousness Studies, Journal of the American Philosophical Association и Synthese. Најново, заедно со Јаник Капез (Yannic Kappes), Алексиев е ко-уредник на зборникот Epistemology of Grounding, којшто наскоро ќе биде објавен од Cambridge University Press.  

Светскиот ден на логиката првпат започнува да се одбележува на 14 јануари 2019 година кога тој е озваничен од страна на УНЕСКО и на Меѓународниот совет за филозофија и хуманистички науки (International Council for Philosophy and Human Sciences). Датумот е избран бидејќи тој ден поврзува две големи имиња на современата логика, Алфред Тарски и Курт Гедел; имено, првиот, на тој ден е роден во 1901 год., додека, вториот, умира во 1978 година.

Настанот ќе се одржи на 14 јануари (среда) со почеток во 12 часот и ќе може да се проследи преку Zoom – онлајн платформата на следниот линк:

https://zoom.us/j/5129135659?pwd=d3puc1k0S0tiZ2tZTmZZZXM4czhWZz09