OFF ПРОГРАМА НА 15. ФФФ

by · Published · Updated

Во најава на Главната програма на 15. ФФФ што ќе се одржи од 22-28 мај, оваа седмица се предвидени неколку случувања што се во поддржани од Британскиот совет. Имено, љубителите на експерименталниот филм ќе имаат можност да учествуваат/присуствуваат на два значајни настани инспирирани од делото на реномираната иранско-британска уметница и филмска авторка, Меријам Тафакори.

Меријам Тафакори е позната по својата работа со филмски колаж, архивски материјали и поетска нарација, преку кои истражува теми како меморијата, идентитетот, интимноста и цензурата во постреволуционерната иранска кинематографија. Нејзините дела се прикажувани на реномирани фестивали како Локарно, Торонто и New York Film Festival, но и во институции како MoMA и Tate Modern.

 

(1) Работилница за експериментални видео форми инспирирана од Меријам Тафакори

Работилницата ќе се фокусира на методолошките пристапи на Тафакори, чија што кинематографска практика ги истражува сензуалноста и неизговореното во иранскиот филм. Учесниците ќе имаат можност да работат со колажни техники, реорганизација на постоечки визуелни архиви, текст и звук, со цел создавање нови релации, значења и наративи.

🎬 Теми на истражување:

  • Како цензурата во иранската кинематографија поттикнува алтернативни визуелни и наративни стратегии;
  • Како филмскиот колаж може да реинтерпретира постоечки слики и да создава нови значења;
  • Употребата на персиска поезија и гласовни записи како средства за изразување потиснати емоции.

Фасилитатори: Артан Садику (филозоф и куратор), Ивана Мирчевска (уметница) и Ѓорги Пулевски (културен работник).

📅 27 март | 14:30 часот
📍 КСП Центар-Јадро

 

 

(2) Проекција на филмови и разговор со Меријам Тафакори

Како дел од OFF програмата на 15. издание на Филозофскиот филмски фестивал, ќе бидат прикажани четири значајни филмови на Тафакори:

🎬  Irani Bag (2021),

🎬 Nazarbazi (2022),

🎬 Code Names (2022) и

🎬  Mast-del (2023).

По проекцијата ќе следи онлајн разговор со авторката, модериран од страна на Ивана Мирчевска и Ѓорги Пулевски.

📅 28 март | 20:00 часот
📍 Музеј на современата уметност – Скопје

 

You may also like...