21. Светски ден на филозофијата

Институтот за филозофија (Филозофија Фзф УКиМ) при Филозофски факултет – Скопје (Универзитет „Св. Кирил и Методиј“ – Скопје) и Филозофското друштво на Македонија на 21-22 ноември го одбележаа Светскиот ден на филозофијата. Традиционално, веќе осми пат по ред, настанот беше отворен со Мал концерт на студентите од Факултетот за музичка уметност, во класата на проф. м-р Дарко Багески (Дуо Балкан и квартет ФМУ). Собирот со пригодна реч го поздравија деканот на Филозофскиот факултет, проф. д-р Оливер Бакрески и претседателот на Филозофското друштво на Македонија, Љупчо Митковски. Потоа, следеше промоција на 35. издание на „Филозофска трибина“, за коешто промотивна реч одржа м-р Александар Богатинов. На крајот од свечениот сегмент од Програмата беше доделена наградата „Константин Философ“ за животно дело за 2024 година, којашто годинава му припадна на проф. д-р Мирко Ѓошевски.